MOOSES
Moses
Moisés
Apresentação: Mabel Dewes
Em Mooses sayn kexicht tsaycht uns was pasëyert is wii te kheenich fon Ëgypt aarich pees këp is mit em folek fon Israel un hot kexikt tas ti kanse puupcher fon Israel um keprung keepte soo wii se uf ti wëlt kheemte.
Yëts tan, siin mëyer mool wii Hërkot kluuchheet këp hat tas en moter sayn khintche sayn leewe rëte khont.
Te kheenich fon Ëgypt hot kexikt tas ti kanse puupcher fon Israel in tas Nilo flus kexmis keepte, soo wii se uf ti wëlt keemte.
En taach, is en puupche uf ti wëlt khom fon en Israelite fraa un ti hot kesiin tas tas en iwer xeen puupche waar. Too hot ti fraa tas khint traay moonate ferxtëkelt.
Ti moter khont tas khint nët wayrer ferxtëkle.
Too hot se en khorep kehool, hot ti kanse lëchelcher tsuu ketëkt, hot tas khint rin keleet un hot te khorep an ti rant fom Nilo flus kelos. Un tëm khint sayn xwëster is fon wayrem am kuke keplip, fer siin was mit tëm paseere teet.
Tëm kheenich sayn tochter is sich an te flus paare kang un hot te khorep kesiin.
Wii se te khorep uf kemach hot, hot ti prinsesin en khint trin kesiin woo am prile waar.
Ti hot kesiin tas es en Israelite puupche waar. Un hot en ketauert.
Tëm puupche sayn xwëster is mit te prinsesin xprëche kang.
Hot kefroot: Sol ich en Israelite fraa ruufe fer tas khint titi trinke loose un uf pase? Ti prinsesin saat: Yoo!
Too is es kang un hot ti aychne moter fom khint keprung.
Too hot ti moter es khint mit hëm kehool un hot es kroos ketsoo.
Wii tas puupche xon kroos kewakst waar, hot ti moter es te prinsesin ap këp.
Ti prinsesin hot tas puupche aan kenom als sayne aychne khint un hot en te noome Mooses këp. Mooses petayt: “Aus em waser kehool”.