NOEE, Noah, Noé
Apresentação:
Mabel Dewes
Em Noee sayn kexicht tsaycht uns was pasëyert is wii te Hërkot ti kanse layt fernicht hot wal se tsuu xlëcht un tsuu raasent waare.
Noee waar en kuure man un hot Kot imer kehëyert.
En taach, hot Kot iwer te Noee kesaat:
“Hool kuut hols um kuure prëter un mach en kans kroos xif”.
Un Noee hot ales kemach wii Kot kexikt hat.
Soo wii te xif fërtich këp waar, is tas fii rin kang mit Noee un sayn familye.
Is en phëyerche fon yeete sat fii rin kang, wii Kot kexikt hat.
Es hot fërtsich taache un fërtsich nachte kereent.
Tas waser is hëcher un hëcher kang un hot tas xif kehoop. Un too hot tas xif aan kefang se xwime.
Ales was uf te ëyert waar is kaput kang. Ploos Noee un tii woo mit tëm uf em xif waare, sin leewe (lepëntich) keplip.
Sin fiil un fiil taache rom kang. Too hot Noee en taup fliye kelos.
Wii ti taup tsurik khom is, hot se en kriin pleetche im xnaawel keprung.
Soo, is Noee kewaar këp tas es waser niter am keen waar.
Wii ti ëyert truker këp is, sin Noee, sayn familye un tas kanse fii aus em xif kang.
Too hot Kot fer te Noee ferxproch tas es nii mee soo fiil reene (reechne) teet.
Als en tsayche, hot Kot en reen pooche an te himel ketuun.