DAVII
David
Daví
In too tëm pichelche kriin mëyer es se wise wii em Davii sayn kexicht aan kang is. Mëyer siin mool wii Hërkot em keholef hot, un soo is ëyer en kroose kheenich fon Israel këp.
Tas is te aanfang fom kexicht fom kheenich Davii.
Als mool, is te kheenich Saul halwer ferikt këp.
Wën tas pasëyert is, hot ëyer te Davii ruufe kelos.
Tan hot Davii musik fer iim kexpiilt un is ëyer noch mool kuut këp.
Davii waar em xeefer.
Ëyer hot fer sayne papa ti xeef uf kepast.
Davii hot nët kelos tas ti leewe un ti peere sayne fater sayn xeef kefang un kefrës hëre.
Yeete taach is te xikant Golias khom um xraayt iwich ti soltaate fom kheenich Saul sayne militëyer:
-Xikt yimand fer mit mich se khëmfe!
Too hot Davii fer te kheenich kesaat ëyer teet khëmfe mit tëm xikant. Un te kheenich hot tas kelos.
Davii hot sich nët kuut kefun wën se tas aysne tsaych tëm aan ketuun hon woo te kheenich aan ketuun hat fer sich nët wee mache im kriich.
Tee waar tas nët keweent mit tëm xwëyer tsaych un khont nët richtich keen mit tëm.
Too hot ëyer tas ales aus ketsoo un wolt aach nët tëm kheenich sayn xwëyert (espada) penutse.
Te xikant hot sich erxtaunt wii ëyer te yunge Davii kesiin hot un too hot ëyer sich ferlacht.
Awer Davii hot em xteen iwer kexmis mit sayne petok un hot te xikant ketrof in te mite xtën.
Un te xikant is mit te kroos frats uf te porem kefal.
Too hot Davii tëm xikant sayn xwëyert kehool un hot tëm te khop ap kehakt.
Wii ti faynte kesiin hon tas te Golias kaput waar, sin se al aus keris.